कैद नै बस्नुपरेछ भने पनि म तयार छु, तर, गैरकानुनी काम स्वीकार्य छैनः अध्यक्ष घिमिरे
काठमाडौं । नेपाल बार एशोसिएशनका अध्यक्ष गोपालकृष्ण घिमिरेले न्याय परिषद्को विषय सर्वोच्च अदालतले आफ्नो विषय बनाउन आवश्यक नरहेको बताएका छन् ।
मंगलबार आयोजित पत्रकार सम्मेलनमा अध्यक्ष घिमिरेले आफूले न्याय परिषदले गरेको काम, क्रियाकलापको सन्दर्भमा बोलेको विषयलाई लिएर अदालतको अवहेलना मुद्दा चलाउन आवश्यक नरहेको बताएका हुन् ।
प्रस्तावित प्रधानन्यायाधीश प्रकाशमानसिंह राउतसमेतले हस्ताक्षर गरेको हरिकृष्ण कार्कीको प्रतिवेदनले अदालतको बेथितिबारे आफूले बोलेभन्दा कडा रहेको उनले बताए ।
घिमिरेले अदालतको अवहेलना मुद्दाको डटेर मुकाविला गर्ने बताए । उनले भने, ‘न्याय परिषद्को अध्यक्ष हुनुहुन्छ, संवैधानिक परिषद्को सदस्य पनि हुनुहुन्छ । संवैधानिक संस्थामा बस्ने अनि, मुद्दाको रोहमा यो बोलिएको होइन । यो न्याय परिषदले गरेको काम, क्रियाकलापको सन्दर्भमा बोलिएको शब्द हो । त्यसैले यो विरोध गर्न पाइन्छ । हरिकृष्ण कार्कीको प्रतिवेदनमा स्वयं भोलि बन्न लाग्नुभएको प्रधानन्यायाधीश प्रकाश राउतले सिग्नेचर गर्नुभएको छ । त्यो प्रतिवेदन सार्वजनिक छ । त्यो प्रतिवेदन त मैले बोलेको कुराभन्दा धेरै कडा छ ।’
उनले अदालतको अवहेलना मुद्दा फेस गर्ने क्रममा त्यसको परिणाम कैद नै बस्नुपर्ने आएपनि आफू तयार रहेको बताए । परिस्थिति जेसुकै भएपनि आफू गैरकानुनी र गैरसंवैधानिक कामलाई सही भन्न नसक्ने उनले बताए ।
उनले भने, ‘संविधानको रक्षा, कानुनको रक्षामा हामी लागिरहने छौं । कानुनको शासन र स्वतन्त्र न्यायापालिकाको लागि मैले मुद्दा फेस गर्दा त्यसको परिणाम जे आएर कैद नै बस्नुपरेछ भने पनि म तयार छु । तर, म गैरकानुनी, गैर संवैधानिक कामलाई संवैधानिक भन्न सक्दिनँ ।’
घिमिरेविरुद्ध सर्वोच्च अदालत प्रशासनले चलाएको अदालतको अवहेलना मुद्दामा आगामी कात्तिक १ गतेका लागि पेशी तोकिएको छ ।
