अमेरिका प्रवेश गर्ने उद्देश्यले हिंडेका १७६ नेपाली ब्राजिलमा अलपत्र, प्रवेशाज्ञा लिएर मात्र यात्रा गर्न दूतावासको आग्रह
काठमाडौं । अवैध रुपमा दक्षिण अमेरिका हिँडेका १७६ जना नेपाली ब्राजिलमा अलपत्र परेका छन् । ब्राजिलस्थित नेपाली दूतावासले विज्ञप्ति जारी गरी १७६ जना नेपाली साओपाउलो विमानस्थलको ट्रान्जिट इलाकामा रहेको जानकारी दिएको हो । उनीहरु सबै सकुशल रहेका र आवश्यक मानवीय सहायता पुर्याउने दूतावासले जनाएको छ ।
ब्राजिल सरकारले तत्काल लागू हुने गरी नेपाल लगायत केही देशका राहदानीबाहकलाई प्रवेशाज्ञा लिएको भएमा मात्र ब्राजिल प्रवेशको अनुमति दिने नियम ल्याएको दूतावासले स्पष्ट पारेको छ ।
अब उप्रान्त नेपाली आगन्तुकले ब्राजिल भएर सिधै गन्तब्य मुलुकतर्फ उड्न पाउने, र त्यसरी नगएमा सोही विमानमार्फत् फिर्ता पठाइने तर विमानस्थलमा शरणार्थीको मान्यता नदिइने जनाइएको छ ।
दूतावासले भनेको छ, ‘दक्षिण अमेरिकाका ब्राजिल लगायतका मुलुक हुँदै अवैध रुपमा संयुक्त राज्य अमेरिका प्रवेश गर्ने उद्देश्यले विभिन्न स्थानबाट दक्षिण अमेरिकी मुलुकहरुमा आउने प्रवृत्ति बढ्दो छ । संगठित रुपमा संचालित मानव तस्करहरूको प्रलोभन र उक्साहटमा परी नेपालबाट समेत युवाहरु यस क्षेत्रमा आउने गरेको जानकारी बेलाबेलामा हुने गरेको छ। कयौँले अकल्पनीय पीडा व्यहोर्नुका साथै ठूलो धनराशी खर्च गर्नुपर्ने परिस्थितमा फस्न पुगेको पाइएको छ।’
साथै दूतावासले जायज कारण भए पुष्टि हुने कागजात र प्रवेशाज्ञा लिएर मात्र ब्राजिल आउन वा ब्राजिल भएर अन्य देशको भ्रमणमा जान अनुरोध समेत गरेको छ ।
