लायन्स क्लबद्वारा पोखरामा बालबालिकाहरुका लागि क्यान्सर सचेतना कार्यक्रमको आयोजना
पोखरा । लायन्स इन्टरनेशनल डिस्ट्रिक ३२५ एम अन्तरगत पर्ने ३ वटा क्लबले संयुक्त रुपमा बालबालिकाहरुका लागि क्यान्सरसम्बन्धी सचेतना कार्यक्रमको आयोजना गरेका छन् ।
पोखरा महानगरपालिका वडा नम्बर २३ स्थित माझँथुममा रहेको सिद्धबराह माविका विद्यार्थीहरुलाई एक कार्यक्रमको आयोजना गरी क्यान्सरसम्बन्धी विविध जानकारीसहित चेतनामूलक सचेतना कार्यक्रम बुधबार आयोजना गरेको हो ।
लायन्स क्लब अफ पोखरा ब्लु स्काई, लायन्स क्लब अफ पोखरा साझा चौतारी र लायन्स क्लब अफ पोखरा समता प्रदेशले आयोजना गरेको बालबालिकामा क्यान्सर सम्बन्धी सचेतना कार्यक्रम संयोजक डा. सरस्वती न्यौपानेद्वारा बालबालिका विभिन्न जिज्ञासा र प्रश्नहरुलाई समेटेर प्रशिक्षित गरिएको उक्त कार्यक्रममा प्रमुख अतिथि जिएसटी कोर्डिनेटर जगन्ननाथ तिमिल्सिना रहेका थिए ।
अन्य अतिथिहरुमा कलस्टर १ का प्रमुख लक्ष्मण तिमिल्सिना, सिद्धबराह माविका प्रधानाध्यापक बद्धिनाथ पराजुली, विद्यालय व्यवस्थापन समितिका अध्यक्ष गुरुदत्त पराजुली, रिजन चियर पर्सन युवराज पौडेल, जोन चियर पर्सन लक्ष्मी बराललगायत रहेका थिए ।
क्यान्सर कसरी लाग्न सक्छ ? यसका लक्षणहरु के कस्ता हुन्छन् ? क्यान्सरबाट बच्न कसरी सकिन्छ ? यसको औषधि उपचार र अवस्था के कस्तो छ ? जस्ता विभिन्न विषयवस्तुलाई समेटेर प्रस्तुत गरिएको क्यान्सर सम्बन्धी सचेतना कार्यक्रममा विद्यालयका कक्षा ११ र १२ मा अध्ययनरत विद्यार्थीहरु, शिक्षक र क्लबबाट सहभागी सदस्यहरुको सहभागिता रहेको थियो ।
पोखरा ब्लु स्काईका अध्यक्ष बिन्दु शर्माको अध्यक्षतामा सम्पन्न कार्यक्रमको संयोजक विद्यालयका शिक्षक निर्मल शर्मा रहेका थिए भने कार्यक्रमको संचालन मेनका पौडेलले गरेकी थिइन् ।
