संसदीय समितिले लियो सूर्यदर्शन सहकारीका संचालक कुमार रम्तेल, महेन्द्र भोटे र भविश्वर अर्यालसँग बयान

काठमाडौं । सहकारी संस्था वचत रकम दुरुपयोग सम्बन्धमा गठित संसदीय छानबिन विशेष समितिले सूर्यदर्शन सहकारीका संचालक र पूर्वसंचालकहरुसँग सोधपुछ गरेको छ ।

कास्की कारागारमा थुनामा रहेका उनीहरुलाई समितिले मंगलबार काठमाडौं झिकाएर सोधपुछ गरेको हो । समितिले सहकारीका सचिव तथा गोरखा मिडिया नेटवर्क प्रालिका सञ्चालक कुमार रम्तेलसँग सोधपुछ गरेको छ ।

त्यस्तै, सूर्यदर्शन सहकारीका पूर्वसञ्चालक तथा वेभ डेभलपर भविश्वर अर्याल र शिवकुमार गुरूङ(महेन्द्र भोटे)सँग पनि सोधपुछ गरेको छ । उनीहरु तीनैजना अदालतको आदेशमा कास्की कारागारमा छन् । समितिले यसअघि थुनामा रहेका अन्य सहकारीका संचालकहरुसँग पनि सोधपुछ गरेको थियो ।

सर्वसाधारणको बचत रकम हिनामिना भएका अन्य सहकारीका संचालकहरुसँग पनि सोधपुछ गर्न बाँकी रहेको र यो क्रम जारी रहेको समितिले जनाएको छ ।