सहकारी ठगी छानबिन गर्न गठित संसदीय समितिले प्रहरी प्रमुख र गृहसचिवसँग छलफल गर्ने
काठमाडौं । सहकारी संस्था बचत रकम दुरुपयोग सम्बन्धमा गठित संसदीय छानबिन विशेष समितिले प्रहरी प्रमुखसँग छलफल गर्ने भएको छ ।
बिहीबार बसेको समितिको बैठकले शुक्रबारको बैठकमा प्रहरी प्रमुख, गृहसचिव, सीआईबी प्रमुख, अपराध अनुसन्धान विभाग प्रमुखलाई छलफलका लागि बोलाएको समितिका संयोजक सूर्य थापाले जानकारी दिए ।
उनले भने, ‘आजको बैठकमा नियमनको स्थिति र प्रभावकारी निकायको आवश्यकता लगायतका विषयमा गम्भीर छलफल भएको छ । साथै, समितिले माग गरेका कागजातहरू छिटो उपलब्ध हुनेगरी संयोजन गर्न सहकारी विभागको नेतृत्वलाई ध्यानाकर्षण गरिएको छ । भोलिको बैठकमा सीआईबी प्रमुख, अपराध अनुसन्धान विभाग प्रमुख, नेपाल प्रहरीको नेतृत्व र गृह मन्त्रालयको प्रशासनिक नेतृत्वसँग जानकारी लिने कार्यसूची रहेको छ।’
समितिले बिहीबार महालेखापरीक्षक तोयम राय, सम्पत्ति शुद्धीकरण अनुसन्धान विभागका महानिर्देशक कमलप्रसाद भट्टराई, र सहकारी विभागका रजिस्ट्रार पिताम्बर घिमिरेलगायतसँग छलफलसँग गरेको छ ।
गृहमन्त्री रवि लामिछाने सहकारीको रकम अपचलनमा मुछिएपछि गत जेठ १५ गते छानबिनका लागि संसदीय समिति गठन गरिएको हो । कांग्रेसले लामो समयसम्म सदन अवरुद्ध गरेपछि समिति गठन गर्न सत्तापक्ष बाध्य भएको थियो । सात सदस्यीय समितिलाई छानबिनका लागि तीन महिनाको समय दिइएको छ ।
