नक्कली भुटानी शरणार्थी प्रकरणमा फरार रहेका बेचन झा पक्राउ
काठमाडौं । नक्कली भुटानी शरणार्थी प्रकरणमा संलग्न रहेको आरोपमा प्रहरीले बेचन झालाई प्रहरीले पक्राउ गरेको छ । जिल्ला प्रहरी परिसर काठमाडौँको टोलीले झालाई पक्राउ गरेको परिसरका प्रवक्ता एसपी नवराज अधिकारीले जानकारी दिएका छन् ।
झामाथि बिचौलियालाई गृहमन्त्री, सचिव लगायतसँग भेट गराइदिन मध्यस्थकर्ताको रूपमा भूमिका खेलेको आरोप लागेको छ । उनले टोखाका रामशरण केसीसँग दुई करोडको चेक लिएका प्रहरी अनुसन्धानबाट खुलेको थियो ।
झाले भुटानी शरणार्थी सम्बन्धी मन्त्रिपरिषदबाटै निर्णय गराउने भन्दै रकम असुल गरेको बताइन्छ । यसअघि शुक्रबार प्रहरीले पूर्वगृहमन्त्री रामबहादुर थापा बादका छोरा प्रतिक थापालाई बौद्धबाट पक्राउ गरेको थियो ।