काठमाडौंका विभिन्न स्थानबाट लागूऔषधसहित पाँचजना पक्राउ
काठमाडौं । प्रहरीले औषधि पसलबाट लागूऔषध बिक्री गरेको आरोपमा पाँच जनालाई पक्राउ गरेको छ । पक्राउ पर्नेमा गोरखाकी बिनिता कुमाल, भक्तपुरको भक्तपुर नगरपालिका–४ घर भएका २४ वर्षीय रुकेश श्रेष्ठ, सिन्धुली घर भएका २३ वर्षीय राकेश खड्का, रुकुमका दीपेन्द्र ओली र ओखलढुंगाको सुनकोशी गाउँपालिका–७ घर भएका २२ वर्षीय ध्रुव कटवाल छन् ।
गोंगबुस्थित मित्रनगरमा बिनिता कुमालको नाममा दर्ता रही कविता फार्मेसी नामको औषधि पसलमा लागूऔषध बिक्री/वितरण भइरहेको भन्ने सूचनाको आधारमा प्रहरी प्रभाग गोंगबुबाट खटिएको प्रहरी टोलीले उनलाई पक्राउ गरेको हो । उनी फार्मेसी संचालक हुन् ।
त्यस्तै कोटेश्वर सहयोगीनगरस्थित श्रीनगर गल्लीमा लागूऔषध बिक्री/वितरण भइरहेको छ भन्ने सूचनाका आधारमा प्रहरी प्रभाग कोटेश्वरबाट खटिएको प्रहरी टोलीले दीपेन्द्र ओलीलाई पक्राउ गरेको र उनको कोठा खानतलासी गर्ने क्रममा लागूऔषध फेला पारेको प्रहरीले जनाएको छ ।
उनीहरुबाट औषधिजन्य लागूऔषध बरामद भएको छ । बिना अनुमति बेच्न नमिल्ने औषधिहरु उनीहरुले किनबेच गरेको पाइएको प्रहरीले जनाएको छ । पक्राउ परेकाहरुविरुद्ध लागु औषधको कसुरमा अनुसन्धान अघि बढाइएको प्रहरीले जनाएको छ ।
बिनिता कुमालको पसलबाट ट्रामाडोल लेखिएको ट्यावलेट ६५० पिस र दीपेन्द्र ओलीको कोठाबाट ट्रामाडोल लेखिएको ट्यावलेट ३८०९४ पिस बरामद गरेको प्रहरीले जनाएको छ ।
