गण्डकी प्रदेश सरकारविरुद्ध कांग्रेसद्वारा सर्वोच्चमा रिट दायर, विश्वासको मत असंवैधानिक भएको जिकिर
काठमाडौँ । नेपाली कांग्रेसले गण्डकी प्रदेशमा मुख्यमन्त्री खगराज अधिकारीले पाएको विश्वासको मत असंवैधानिक भएको भन्दै सर्वोच्च अदालतमा रिट दायर गरेको छ ।
कांग्रेस संसदीय दलका नेता तथा सुरेन्द्रराज पाण्डेले मंगलबार सर्वोच्चमा रिट दायर गरेका हुन् । विश्वासको मत लिँदा प्रदेश सभाको बुहमतको अवैधानिक रुपमा गणना गरेर विश्वासको मत पाएको घोषणा भएपछि कांग्रेस सर्वोच्च अदालतमा पुगेको हो ।
रिटमा अधिकारीले लिएको मतको अवैधानिक रहेकाले अब ठूलो दलको हिसाबले मुख्यमन्त्रीमा नियुक्तिका लागि पाण्डेले परमादेश जारीको माग गरेका छन् । ६० सदस्यीय प्रदेश सभामा अधिकारीले ३० मत पाएका थिए ।
बुहमत पुग्नका लागि ३१ मत हुनुपर्ने कांग्रेसको तर्क छ । तर प्रदेश सभामा सभामुख कृष्णप्रसाद धितालले सर्वोच्च अदालतको आदेशअनुसार भन्दै ३० मतले नै बहुमत पुग्ने गणना गरेका थिए । रिटको पेसी वैशाख २७ गतेका लागि तोकिएको छ।
