प्रधानमन्त्रीलाई विपिनका बाबुआमाको आग्रहः बिन्ती छ मेरो छोराको उद्दार होस्
सुदूरपश्चिम । हमासको नियन्त्रणमा रहेका कञ्चनपुरका विपिन जोशीका बुबाआमाले छोराको रिहाइका लागि पहल गरिदिन प्रधानमन्त्री पुष्पकमल दाहाल प्रचण्डसँग आग्रह गरेका छन् ।
शुक्रबार धनगढी विमानस्थलमा प्रधानमन्त्री प्रचण्डलाई भेटेर विपिनका बुबा महानन्द जोशी तथा आमा पद्मा जोशीले छोराको रिहाइका लागि पहल गर्न आग्रह गरेका हुन् । सुदूरपश्चिम महोत्सवको उद्घाटनका लागि प्रधानमन्त्री दाहाल धनगढी पुगेका हुन् । जवाफमा प्रधानमन्त्री प्रचण्डले विपिनको रिहाइका लागि सकारात्मक पहल सरकारले गरिरहेको बताएका थिए । सरकारले विपिनको रिहाइका लागि हरसम्भव प्रयास गरिरहेको बताउँदै आएको छ ।
परराष्ट्रमन्त्री साउदले अन्तर्राष्ट्रिय समुदाय तथा हमासका सहयोगी शक्तिका नेताहरूसँग पनि विपिनको रिहाइका लागि पहल गरेको केहीअघि बताए पनि ठोस रूपमा काम हुन सकिरहेको छैन । सुदूरपश्चिम विश्वविद्यालयको कृषि विज्ञान संकायमा अध्ययनरत विपिन सहितका ४९ विद्यार्थीहरु ‘लर्न एण्ड अर्न’ कार्यक्रमअन्तर्गत गत भदौ २७ गते इजरायल गएका थिए ।
गत असोज २० गते किबुजस्थित कृषि फार्ममा हमासले गरेको आक्रमणमा परी १० नेपाली विद्यार्थीको मृत्यु भएको थियो भने कञ्चनपुरको भीमदत्त नगरपालिका–३ का जोशी सम्पर्कविहीन भएका थिए ।
इजरायली सेना र तेलअविवस्थित नेपाली राजदूतावासले विपिन हमासको नियन्त्रणमा रहेको पुष्टि गरे पनि उनको अवस्था कस्तो छ भन्ने खुलेको छैन । यसअघि परराष्ट्रमन्त्री एनपी साउद कञ्चनपुर गएका बेलामा पनि विपिनका आमा–बुवाले उनीसँग भेटेर विपिनको अवस्था पत्ता लगाउन भइरहेको प्रयासबारे जानकारी लिएका थिए ।