‘विधिको शासनको रट लगाएर नथाक्ने नेपाली कांग्रेसका मन्त्रीको यो हर्कतबाट लोकतन्त्र लजाएको छ’
काठमाडौँ । वीर अस्पतालको निर्देशकबाट हटाइएका डा सन्तोष पौडेल स्वास्थ्य मन्त्री मोहनबहादुर बस्नेतको कदमबाट आक्रोसित भएका छन् । पौडेलले आफूलाई राजनीतिक आस्थाका आधारमा स्वास्थ्यमन्त्रीले पदबाट हटाएको भन्दै आक्रोसित भएका हुन् । उनले स्वास्थ्यमन्त्रीको कदमबाट लोकतन्त्र पनि लजाएको टिप्पणी गरेका छन् ।
उनले भनेका छन्, ‘विधिको शासनको रट लगाएर नथाक्ने नेपाली कांग्रेसका मन्त्रीको यो हर्कतबाट ‘लोकतन्त्र लजाएको छ !’ पौडेलले आफू दुई वर्षको अवधि तोकेर नियुक्ति पाएको तर राजनीतिक आस्थाको आधारमा निर्देशकबाट हटाइएको र एक जना हाडजोर्नीको विशेषज्ञ सर्जनलाई मन्त्रालयमा तानेर मन्त्रीले ‘हर्कत’ देखाएको बताएका छन् ।
उनले भनेका छन्, ‘अधिनायक तत्कालिन राजा ज्ञानेन्द्र शाहले शेरबहादुर देउवालाई प्रधानमन्त्रीबाट हटाउँदा ‘निर्वाचन गराउन नसकेको, ‘अक्षम’ भन्ने आरोप लगाएर हटाएको इतिहास छ ! दुई वर्षको अवधि तोकी नियुक्ति पाएको मलाई त राजनीतिक आस्थाका आधारमा निर्देशकबाट हटाएको मात्र हैन हाडजोर्नीको विशेषज्ञ सर्जनलाई मन्त्रालयमा तानियो ? यो राणा शासन भन्दा कडा अधिनयकबाद हो !’
पौडेललाई गतवर्ष माघमा तत्कालीन स्वास्थ्यमन्त्री पदम गिरीको पालामा वीर अस्पतालको निर्देशक नियुक्त गरिएको थियो । निर्देशक नियुक्त भएदेखि नै अस्पताल सुधार अभियानमा लागेका पौडेलको पालामा वीरको सेवा प्रवाहमा उल्लेख्य सुधार भएको बताइएको छ । तर स्वास्थ्य मन्त्री मोहनबहादुर बस्नेतको ठाडो आदेशमा पौडेललाई निर्देशकबाट हटाएर मन्त्रालयमा तानिएको छ ।
