स्वास्थ्य सम्बन्धी ज्ञान र अनुभव नभएको स्वास्थ्यमन्त्रीलाई तत्काल बर्खास्त गरियोस्ः डा. केसी
काठमाडौं । चिकित्सा शिक्षा सुधारका अभियन्ता डा गोविन्द केसीले स्वास्थ्य तथा जनसंख्यामन्त्री मोहनबहादुर बस्नेतलाई बर्खास्त गर्न माग गरेका छन् । आइतबार विज्ञप्ति जारी गरी डा. केसीले स्वास्थ्य मन्त्रीका रुपमा जिम्मेवारी सम्हालेदेखि नै स्वास्थ्यमन्त्री मेडिकल माफियाका पक्षमा लबिङ गरिरहेको भन्दै बर्खास्त गर्न माग गरेका हुन् ।
उनले भनेका छन्, ‘हालै प्रचण्ड सरकारका स्वास्थ्यमन्त्री मोहनबहादुर बस्नेतले ममाथि लगाएको घोर आपत्तिजनक अभिव्यक्तिप्रति मेरो गम्भीर ध्यानाकर्षण भएको छ। ममाथि लगाएको आरोप कपोलकल्पित र सम्पूर्ण झुठा हुन भन्न चाहन्छु।’
शनिबार ट्रमा सेन्टरमा आयोजित एक कार्यक्रममा स्वास्थ्यमन्त्री बस्नेतले डा. केसी ठीक भए पनि उनलाई गिरोहले सञ्चालन गरिरहेको आरोप लगाएका थिए । स्वास्थ्य मन्त्री बस्नेतसँग स्वास्थ्यसँग सम्बन्धित ज्ञान र अनुभव हुँदै नभएको भन्दै डा केसीले जान्ने प्रयास समेत नगरेको बताएका छन् ।
उनले भनेका छन्, ‘ठूला मुखे गैरजिम्मेवार, भ्रष्ट र गँवार व्यक्तिलाई स्वास्थ्यमन्त्री बनाएर प्रचण्ड र देउवाले स्वास्थ्य मन्त्रालय जस्तो सम्वेदनशील संस्थाको थप भ्रष्टीकरण गरी जनताको स्वास्थ्यमा खेलबाड गर्दैछन्। यो राजनीतिक तथा सामाजिक अपराध हो ।’
