सरकारको निर्णय कार्यान्वयन गर्न टिकटकलाई प्राधिकरणको पत्र
काठमाडौं । नेपाल दूरसञ्चार प्राधिकरणले सामाजिक सञ्जाल टिकटकलाई पत्र लेख्दै नेपाल सरकारको निर्णय अनुसार टिकटकलाई नेपालभित्र नचल्ने बनाएर सहयोग गर्न आग्रह गरेको छ ।
प्राधिकरणले टिकटकलाई पत्र लेख्दै मन्त्रिपरिषद्को निर्णय कार्यान्वयनका लागि सघाउन आग्रह गरेको हो । प्राधिकरणको पत्रमा भनिएको छ, ‘नेपाल सरकारले नेपाल दूरसञ्चार प्राधिकरणलाई टिकटकको प्लेटफर्ममाथिको पहुँचलाई नेपालमा रोक लगाउन निर्देशन दिएको छ। त्यही भएर हामी तपाईँलाई सरकारको निर्णय कार्यान्वयन गर्न सघाउन अनुरोध गर्छौँ र हामी अझै पनि तपाईँलाई टिकटकलाई नेपालभित्र ब्लक गर्न सघाउन अनुरोध गर्छौँ।’
त्यस्तै प्राधिकरणले नेपाल सरकारले प्रतिबन्ध लगाउनेबारे निर्णय गरेका हुनाले सरकारसँगै समन्वय गर्न टिकटकलाई आग्रह गरेको छ । टिकटकले सामाजिक वातावरणमा नकारात्मक प्रभाव पारिरहेको र सामाजिक सद्भावमा क्षति पुर्याइरहेको निष्कर्ष निकाल्दै सरकारले नेपालभित्र टिकटकमाथि प्रतिबन्ध लगाउने निर्णय गरेको प्राधिकरणको पत्रमा उल्लेख छ ।
यसअघि टिकटकले नेपालमा लगाइएको प्रतिबन्धप्रति चिन्ता व्यक्त गर्दै प्राधिकरणलाई पत्र लेखेको थियो । नेपालको मन्त्रिपरिषद्ले गरेको उक्त निर्णय अभिव्यक्ति स्वतन्त्रताको मर्म विपरीत रहेको भन्दै टिकटकले सात बुँदामा नेपालमा आफ्नो प्लेटफर्मका कामहरूलाई राम्रोसँग अघि बढाउन गरेको प्रयासबारे जानकारी गराएको थियो ।
