आरती साह मृत्यु प्रकरणमा धनुषाका प्रहरी प्रमुख तानिए हेडक्वार्टर
काठमाडौं । जिल्ला प्रहरी कार्यालय धनुषाका प्रमुख, प्रहरी उपरीक्षक विश्वराज खड्कालाई प्रहरी प्रधान कार्यालय तानिएको छ । गृह मन्त्रालयको निर्देशनमा प्रहरी प्रधान कार्यालयले एसपी खड्कालाई सोमबार जिम्मेवारीबाट हटाएको हो ।
गृहमन्त्री नारायणकाजी श्रेष्ठका सञ्चार सल्लाहकार कमल गिरीले एसपी खड्कालाई धनुषाबाट प्रहरी प्रधान कार्यालयको अपराध अनुसन्धान विभागमा पठाइएको जानकारी दिए । एसपी खड्कालाई जिम्मेवारीबाट हटाउनुमा आरती साहको मृत्यु घटना जोडिएको छ ।
लामो समयदेखि माइतीघरमा आन्दोलनरत साहका आफन्तले एसपी खड्कालाई जिम्मेवारीबाट हटाए मात्रै सरकारसँग वार्ता गर्ने अडान लिएपछि उनलाई जिम्मेवारीबाट हटाइएको हो ।
सोमबार मात्रै गृहमन्त्री श्रेष्ठले साहको परिवारलाई वार्तामा आउन आग्रह गरेका थिए । गत जेठ ७ गते साह आफ्नै घरमा मृत भेटिएकी थिइन्। त्यस प्रकरणमा आरतीका श्रीमान् मोतीबाबु साह र ससुरा मदन मोहनलाई जिल्ला अदालत धनुषाले पुर्पक्षका लागि कारागार समेत पठाएको थियो।
