शिक्षा विधेयकले स्थानीय सरकारको अधिकारमा हस्तक्षेप गरेको स्थानीय तहको ठहर
काठमाडौं । स्थानीय तहले शिक्षा विधेयक संघीयता विरोधी रहेको बताएका छन् । गाउँपालिका राष्ट्रिय महासंघ र नेपाल नगरपालिका संघले मंगलबार संयुक्त विज्ञप्ति जारी गरी विधेयकले संघीय प्रणालीलाई नै चुनौती दिएको र स्थानीय सरकारको एकल अधिकारमा हस्तक्षेप गरेको बताएका हुन् ।
विज्ञप्तिमा भनिएको छ, ‘विद्यालय शिक्षा विधेयक ल्याउनु संवैधानिक प्रावधान विपरीत रहेकाले किमार्थ स्वीकार गर्न सकिँदैन । स्थानीय सरकारले प्रयोग गरिरहेको माध्यमिक शिक्षासम्मको विधायिकी र कार्यकारी अभ्यासबारे सम्मानित अदालतका फैसलाहरुबाट समेत नजिर स्थापित भइसकेको स्मरण गराउन चाहन्छौं ।’
संविधानतः खारेज भइसकेका जिल्ला शिक्षा कार्यालय, शिक्षा विभाग लगायतका संरचना पुनः ब्यूँताउन खोज्नु र प्रधानाध्यापकको छनोटसमेत जिल्ला शिक्षा कार्यालयबाट गर्न खोज्नु संविधान विपरीत भएको उनीहरुले बताएका छन् ।
