स्ववियुको मतदान सुरु
काठमाडौं । १४ वर्षपछि नेतृत्व चयनका लागि त्रिभुवन विश्वविद्यालयका आंगिक र सम्बन्धन प्राप्त क्याम्पसहरुमा स्वतन्त्र विद्यार्थी युनियनको निर्वाचन भइरहेको छ ।
त्रिभुवन विश्वविद्यालयको केन्द्रीय क्याम्पससहित त्रिविअन्तर्गतका आङ्गिक र सम्बन्धन प्राप्त क्याम्पसहरुमा बिहान आठ बजेदेखि मतदान सुरु भएको छ । त्रिविअन्तर्गत देशभरका ६० आङ्गिक र १ हजार ४० सम्बन्धन प्राप्त क्याम्पसहरुमा स्ववियु निर्वाचन हुँदैछ ।
अपराह्न ४ बजेसम्म मतदान हुने त्रिविको स्ववियु निर्वाचन केन्द्रीय अनुगमन तथा समन्वय समितिका सदस्य सचिव पशुपति अधिकारीले जानकारी दिएका छन् । स्ववियु अध्यक्ष, सचिव, कोषाध्यक्ष र ५० प्रतिशत सदस्य प्रत्यक्ष निर्वाचन प्रणालीबाट निर्वाचित हुँदैछन्। उपाध्यक्ष, सहसचिव र ५० प्रतिशत सदस्य समानुपातिक निर्वाचन प्रणालीबाट निर्वाचित हुने भएका छन् ।
केही क्याम्पसहरुमा भने विवादका कारण स्ववियु निर्वाचनको प्रक्रिया अघि बढ्न सकेको छैन। त्रिभुवन विश्वविद्यालयको केन्द्रीय क्याम्पसमा भने विद्युतीय मतदानको व्यवस्था गरिएको छ।
