गायक खुमन अधिकारीलाई पितृशोक

स्याङ्जा । गायक खुमन अधिकारीलाई पितृशोक परेको छ । गायक अधिकारीका बुवा मुक्तिराम अधिकारीको मंगलबार राति निधन भएको हो। ८१ वर्षीय अधिकारी लामो समयदेखि बिरामी रहेका थिए ।

दशैं अघिसम्म काठमाडौंमै उपचार गराईरहेका अधिकारीको स्वास्थ्यमा सुधार आएपछि स्याङ्जाको गुरुङ्दीस्थित घरमा लगिएको थियो । तर, मंगलबार बिहानदेखि एक्कासी स्वास्थ्य अवस्था बिग्रिएका अधिकारीको राति निधन भएको गायक अधिकारीले जनाएका छन् ।

स्वर्गीय अधिकारीका श्रीमती, दुई छोरा र दुई छोरी छन् । गायक अधिकारी कान्छा छोरा हुन् ।