दोलखामा कांग्रेसलाई टिकट दिँदा एमालेलाई हराउन जति सजिलो छ अरुलाई गाह्रो छः खड्का
काठमाडौं । नेपाली कांग्रेस दोलखाका नेता रुद्र खड्काले दोलखामा नेकपा एमालेलाई पराजित गर्न कांग्रेसलाई टिकट दिनुपर्ने बताएका छन् । न्यूज नेपाल टेलिभिजनको कार्यक्रम संवादमा कुरा गर्दै खड्काले एमालेलाई पराजित गर्न कांग्रेसलाई नै टिकट दिनुपर्ने बताएका हुन् ।
उनले गठबन्धनका शीर्ष नेतालाई सिट बाँडफाँट गर्दा दोलखाको भाग कांग्रेसलाई छुट्याउन आग्रह गरे । त्यसैगरी उनले दोलखाको उम्मेदवारको लागि दाबी गर्ने धेरै कारण रहेको बताए ।
उनले पूर्व पार्टी सभापति उद्धव काफ्लेपछि जिवित नेता म नै हो दोस्रो नम्बरमा रहेको बताए । उनले मागेर राजनीति गर्न हुँदैन भन्ने मान्यता आफूमा रहेको बताए ।
खड्काले भने,‘भएका उम्मेदवार मध्येमा म अब्बल हुँ । धेरै पैसावाल साथीहरु पनि हुनुहुन्छ । तर मेरो र उहाँहरुको ग्राउण्डमा आकाश र जमीनबीच फरक छ ।’ उनले एमालेले गफ शिवाय केही नदिएकाले यसपटक एमाले पराजित हुने दाबी गरे ।
गठबन्धन दलका नेताहरुलाई उनको सुझाव छ,‘म गठबन्धनका नेताहरुलाई आग्रह गर्छु, अनुरोध गर्छु । संघमा कांग्रेसलाई टिकटदिनुस् । सोच्नुस् एकपटक जसरी कांग्रेसलाई टिकट दिँदा एमालेलाई हराउन जति सजिलो छ अरुलाई गाह्रो छ।’
