बैंकको ब्याजदर तत्काल नबढ्ने

काठमाडौं । नेपाल बैंकर्स संघले तत्काल ब्याजदर नबढाउने निर्णय गरेको छ । शुक्रबार बिहान बसेको संघको बैठकले ब्याजदर नबढाउने निर्णय गरेको हो । नेपाल राष्ट्र बैंकले नीतिगत दरहरु बढाएर बैंक ब्याजदर बढाउन प्रेरित गरेपनि बैंकरले आफ्नो पुरानो अडानलाई नै निरन्तरता दिने निर्णय गरेका छन् ।

बुधबार नयाँ नीतिगत दर लागू गर्दै राष्ट्र बैंकले निर्देशन जारी गरेको थियो। २६ वटै बैंकका प्रमुख कार्यकारी र प्रतिनिधिलाई डाकेर बसेको बैठकमा अहिलेकै दरलाई निरन्तरता दिने निर्णय भएको छ । यसो हुँदा संस्थागत निक्षेपको ब्याज घट्ने छ । अहिले साधारण मुद्दति निक्षेपको ब्याज दर ११.०३ प्रतिशत छ।

यसको एक प्रतिशत कम संस्थागतलाई दिनु पर्ने नियम थियो। यसो हुँदा संस्थागतले १०.०३ प्रतिशत ब्याज पाउँदै आएका थिए । बुधबारबाट राष्ट्र बैंकले २ प्रतिशत बिन्दु कम ब्याज दिनु पर्ने नीति लिएको छ। यसो हुँदा संस्थागतले ९.०३ प्रतिशत ब्याज पाउने छन्।