नेपाली सेनाको स्नाइपर प्रतियोगिता(फोटोफिचर)
काठमाडौं । प्रधानसेनापति प्रभुराम शर्माले शुक्रबार काभ्रेपलाञ्चोकको रोहिणी भञ्ज्याङ्गस्थित फायरिङ्ग रेञ्जमा नेपाली सेनाद्वारा सञ्चालित ‘विशेष फौज बाहिनी स्नाइपर प्रतियोगिता’ को निरीक्षण गरेका छन् ।
सोही क्रममा उनले ३०० र ५०० मिटर रेञ्जमा स्नाइपर हतियारबाट फायरिङ्ग, ‘फक्स होल’ स्नाइपर मचान तथा विशेष फौज बाहिनी अन्तर्गतका युनिटहरूले प्रदर्शन गरेका विशेष अपरेशनसम्बन्धी कारबाहीको अवलोकन गरेका थिए ।
सो अवसरमा प्रधानसेनापति शर्मालगायत नेपाली सेनाका रथीवृन्दहरूको सहभागितामा पेस्तोलबाट फायरिङ्ग प्रतियोगिता सञ्चालन भएको थियो भने उनीहरूले स्नाइपर तथा अन्य विभिन्न हतियारबाट फायरिङ्ग अभ्याससमेत गरेका थिए । फायरिङ्ग प्रतियोगितामा उत्कृष्ट हुन सफल सकलदर्जालाई प्रधानसेनापति शर्माले पुरस्कार वितरण गरेका सैनिक जनसम्पर्क तथा सूचना निर्देशनालयले जनाएको छ ।
निरीक्षण भ्रमणको दौरान प्रधान सेनापति शर्माले आजै नगरकोटस्थित नेपाली सैनिक वार कलेजको निरीक्षण गरेर उक्त वार कलेजको वस्तुस्थिति, तालिम गतिविधिलगायत विविध पक्षबारे जानकारी हासिल गरी सकलदर्जालाई सम्बोधन गरेका थिए ।
