नेपाल इन्जिनियरिङ कलेजका ६ जना पूर्वसञ्चालकविरूद्ध भ्रष्टाचार मुद्दा दायर
काठमाडौं । सम्पत्ति शुद्धीकरण विभागले भक्तपुरको चाँगुनारायणस्थित नेपाल इन्जिनियरिङ कलेजका पूर्वअध्यक्ष लम्बोदर न्यौपाने र ६ पूर्व सञ्चालक समितिका सदस्यविरूद्ध विशेष अदालतमा मुद्दा दायर गरेको छ ।
विशेष सरकारी वकिल कार्यालयले मुद्दा चलाउन अनुमति दिएपछि विभागले बिहीबार विशेष अदालतमा मुद्दा दर्ता गरेको विभागका सूचना अधिकारी विनोदकुमार दाहालले जानकारी दिएका छन् ।
विभागले पूर्वअध्यक्ष लम्बोदर न्यौपानेलाई १२ करोड ४४ लाख १२ हजार ७५५, पूर्वसञ्चालक समितिका सदस्यहरू रामरत्न उपाध्यायलाई १ करोड २५ लाख ३८ हजार ६२, उपेन्द्र गौतमलाई २ करोड २९ लाख ६७ हजार २११, लबराज भट्टराई २ करोड ७९ लाख ५५ हजार ६ सय, हरिप्रसाद पाण्डेलाई २ करोड ४३ लाख ४९ हजार २०७, सूर्यबहादुर केसीलाई २ करोड ३४ लाख २१ हजार ५ सय र दीपकप्रसाद भट्टराईलाई ३६ लाख ५९ हजार रुपैयाँको सम्पत्ति शुद्धीकरण गरिएको अभियोग लगाएको छ ।
उनीहरू सबैबाट बिगोको दोब्बर जरिवाना पनि माग गरिएको छ । उनीहरूले संगठित रूपमा कलेजको रकम हिनामिना गरी सिद्धार्थ बैंकमा छुट्टै खाता खोलेर अन्य बैंकबाट कलेजको रकम सारी खाता र खर्चको अभिलेख नराखी झन्डै ८ करोड रकम हिनामिना गरेको उजुरी परेको थियो। उक्त उजुरी परेपछि विभागले विगत २ वर्षदेखि छानबिन गर्दै आइरहेको थियो ।
सामाजिक संस्थाको हैसियतमा खुलेको कलेजलाई ठगेर सम्पत्ति जोडेको भन्दै विभागले उनीहरूविरूद्ध मुद्दा चलाएको हो । उनीहरू सबैका चल–अचल सम्पत्तिबाट बिगो जफत गर्न विशेष अदालतसमक्ष विभागले माग गरेको छ।
