‘न्यायाधीश र कानुन व्यवसायीले तिरस्कार गरिसकेपछि पनि न्यायपालिका चलाउन आँट गर्नु प्रधानन्यायाधीशको दिवा सपना’
काठमाडौं । सर्वोच्च अदालत बार एसोसिएसनका अध्यक्ष तथा वरिष्ठ अधिवक्ता पूर्णमान शाक्यले सर्वोच्च अदालतका अन्य न्यायाधीशले प्रधानन्यायाधीशसँग बेञ्च सेयर गरे आफूहरुले बेञ्च बहिष्कार गर्ने बताएका छन् ।
बिहीबार नेपाल बार एसोसिएसन परिसरमा विरोध प्रदर्शनपछि सम्बोधन गर्दै शाक्यले प्रधानन्यायाधीशसँग न्यायाधीशहरुले बेञ्च सेयर गरेमा बारले बेञ्च बहिष्कार गर्ने बताएका हुन् । उनले प्रधानन्यायाधीशलाई वैधता दिने काम आफूहरुले स्वीकार नगर्ने बताए ।
उनले भने,‘हरिकृष्ण कार्कीको प्रतिवेदनको पनि एउटा महत्वपूर्ण हाम्रो माग हो । त्यस प्रक्रियामा जानेकुरामा हामीलाई केही पनि भन्नु छैन ।तर त्यो गोलाप्रथाबाट यदि प्रधानन्यायाधीशले गोला लिने र उहाँको बेञ्चमा बस्ने कार्य भयो भनेदेखि त्यसको हाम्रो घोर आपत्ति हुन्छ । र जुन न्यायाधीशले प्रधानन्यायाधीशसँग बेञ्च सेयर गर्छ त्यो बेञ्च हाम्रो वहिष्कार हुन्छ । हामी त्यसमा बहस गर्दैनौँ ।’
शाक्यले न्यायाधीशहरु र कानुन व्यवसायीहरुले तिरस्कार गरिसकेपछि पनि न्यायपालिका चलाउनु भनेर आँट गर्नु प्रधानन्यायाधीशको दिवा सपना मात्र भएको बताए । उनले प्रधानन्यायाधीशले बहिर्गमनको बाटो नलिएमा सर्वोच्च अदालत प्रवेश गर्ने वैकल्पिक बाटो पनि बन्द गर्ने चेतावनी दिए ।
