निर्वाचन आयोगविरुद्ध महन्थ ठाकुर सर्वोच्चमा, बहुमतको परीक्षण रोक्न माग
काठमाडौँ । जनता समाजवादी पार्टी (जसपा) को विवाद निरुपण गर्ने निर्वाचन आयोगको निर्णय रोक्न अध्यक्ष महन्थ ठाकुर सर्वोच्च अदालत पुगेका छन् ।
निर्वाचन आयोगले जसपा आधिकारिकता विवादको निर्क्योल साउन ११ गते केन्द्रीय कार्यकारिणी समितिका सदस्यहरूको सनाखतबाट गर्ने निर्णयविरुद्ध ठाकुर सर्वोच्च अदालत पुगेका हुन् । ठाकुरले वारेसमार्फत सर्वोच्च अदालतमा निर्वाचन आयोग र अध्यक्ष उपेन्द्र यादवलगायतलाई विपक्षी बनाएर शुक्रबार रिट निवेदन पेस गरेका छन् ।
निर्वाचन आयोगले आधिकारिकताको विवाद टुंगो लगाउँदा आफूलगायतलाई अपूरणीय क्षति पुग्ने भन्दै रोक लगाउन आदेश माग्दै ठाकुर सर्वोच्च पुगेका हुन् । निर्वाचन आयोग र अध्यक्ष यादवको क्रियाकलपाले जसपा र आफूलाई प्रतिकूल असर परेको पनि ठाकुरले रिट निवेदनमा उल्लेख गरेका छन् ।
