पाँच दलीय गठबन्धन जोगाउनेबारे प्रचण्ड र नेता नेपालबीच वार्ता
काठमाडौँ । नेकपा माओवादी केन्द्रका अध्यक्ष पुष्पकमल दाहाल प्रचण्ड र नेकपा एमालेका वरिष्ठ नेता माधवकुमार नेपालबीच भेटवार्ता भएको छ । शनिबार दिउँसो दुई नेताबीच भेटवार्ता भएको हो । नेता नेपाललाई भेट्न प्रचण्ड नेपाल निवास कोटेश्वर गएका थिए ।
अध्यक्ष प्रचण्डका प्रेस सल्लाहकार विष्णु सापकोटाले दुई नेताबीच समसामयिक विषयमा छलफल भएको जानकारी दिएका छन् । आइतबारदेखि संसद अधिवेशन सुरु हुने भएकाले त्यसबारे दुई नेताबीच छलफल भएको उनले बताए ।
त्यस्तै उनीहरुबीच पाँच दलीय गठबन्धन जोगाउने विषयमा पनि छलफल भएको बताइएको छ । भेटका क्रममा अध्यक्ष प्रचण्डले नेता नेपालसँग सरकारमा आउने विषयमा समेत जिज्ञासा राखेका थिए ।
तर नेता नेपालले पार्टिमा देखिएको विवाद मिलाउन अझै पनि कुरा भइरहेकाले तत्कालै त्यसबारे नसोचेको बताइएको छ । प्रधानमन्त्रीबाट पदमुक्त भई बालुवाटारबाट बालकोटस्थित निजी निवास पुगेपछि एमाले अध्यक्ष केपी ओलीले माधव नेपाललाई पार्टीमा ठाउँ नभएको भन्दै गद्दार घोषणा गरेका छन् । पाँच दलीय गठबन्धनमा एमालेको नेता नेपाल देउवा सरकार टिकाउने कुरामा निर्णायक छन् ।
