कम्युनिष्टहरुको एकताका लागि विप्लवले गरे प्रचण्ड र माधव नेपालसँग छलफल
काठमाडौं । नेपाल कम्युनिष्ट पार्टीका महासचिव नेत्रविक्रम चन्द विप्लवले राजनीतिक भेटघाटलाई तीव्र बनाएका छन् । लामो समयपछि नेकपा माओवादी केन्द्रका अध्यक्ष पुष्पकमल दाहालसँग बुधबार भेट गरेका विप्लवले बिहीबार एमाले वरिष्ठ नेता माधवकुमार नेपाल र प्रचण्डसँग संयुक्तरुपमा छलफल गरेका हुन् ।
विप्लवले बिहीबार बिहान नेता नेपाल निवासमा प्रचण्ड र नेपालसँग छलफल गरेका हुन् । सरकार परिवर्तनसँगै विप्लवले विगतमा भएका सहमतिको कार्यान्वयनका लागि छलफल गरेका हुन् । विप्लव नेतृत्वको नेकपा र ओली सरकारबीच पार्टीका नेता कार्यकर्ताको मुद्दा फिर्ता र बन्दी रिहाइलगायतको सहमति भएको थियो ।
तर नेकपाका कार्यकर्ताको मुद्दा फिर्ता भएको छैन । जसका कारण सबै नेता कार्यकर्ता रिहा भएका छैनन् । बुधबार प्रचण्डसँगको भेटमा उनीहरुबीच पूर्वमाओवादीहरु एक हुने विषयमा छलफल भएको बताइएको छ । त्यस्तै आज तीन नेताबीच पनि कम्युनिष्ट एकताकोबारेमा कुराकानी भएको बताइएको छ ।
