अमेरिकाबाट सोमबार जोन्सन एन्ड जोन्सनको खोप काठमाडौं आइपुग्ने
काठमाडौं । अमेरिकाले कोभ्याक्स सुविधामार्फत नेपाललाई दिन लागेको खोप आगामी सोमबार बिहान काठमाडौं आइपुग्ने भएको छ । प्रधानमन्त्री केपी शर्मा ओलीका परराष्ट्र सल्लाहकार राजन भट्टराईका अनुसार जोन्सनस एण्ड जोन्सनको १५ लाख डोज खोप सोमबार बिहान काठमाडौं आइपुग्नेछ ।
नेपालका लागि अमेरिकी राजदूत र्याण्डी बेरीले शुक्रबार केही दिनमा अमेरिकाले १५ लाखभन्दा बढी नेपालीलाई पुग्ने गरी कोभिड–१९ खोप निःशुल्क उपलब्ध गराउने जानकारी गराएका थिए ।
उनले शुक्रबार सामाजिक सञ्जालमार्फत नेपाल–अमेरिका साझेदारीको ७३ वर्ष लामो यात्रामा यो आफ्नो लागि अत्यन्तै खुशीको क्षण भएको समेत बताएका थिए ।
