दोस्रोपटक भएको मन्त्रिपरिषदविस्तार विरुद्ध सर्वोच्चमा पूरक रिट दर्ता
काठमाडौं । दोस्रोपटक भएको मन्त्रिपरिषदविस्तार विरुद्ध आइतबार सर्वोच्च अदालतमा पूरक रिट दर्ता भएको छ । जेठ ७ गते प्रतिनिधिसभा विघटन गरी निर्वाचन घोषणा गरिसकेपछि पहिलोपटक मन्त्रिपरिषदको विस्तार गरिएकोमा त्यसलाई बदर गरिपाँउ भनी सर्वोच्चमा वरिष्ठ अधिवक्ता दिनेश त्रिपाठीले रिट दायर गरेका थिए ।
उक्त रिटमा अन्तरिम आदेशसम्बन्धी छलफलका लागि सर्वोच्च अदालतले विपक्षीहरूलाई झिकाउने आदेश गरिसकेको अवस्था जेठ २७ गते प्रधानमन्त्री ओलीले पुनः मन्त्रिपरिषद विस्तार गरेपछि आइतबार पूरक रिट दर्ता गरेको त्रिपाठीले बताएका छन् ।
पूरक निवेदनमा प्रधानमन्त्रीको सिफारिस एवं सो सिफारिसबमोजिम सोही मितिमा राष्ट्रपतिबाट मन्त्रिपरिषदमा गरिएको नयाँ नियुक्ति, हेरफेर तथा कार्य विभाजन तथा सोबाट निसृत सबै काम कारवाहीहरु उत्प्रेषणको आदेशद्वारा बदर गरी परमादेश लगायत अन्य आदेश जारी गरी पाउन माग गरिएको छ । आइतबार दर्ता भएको रिटमाथि असार ८ गते सुनुवाई हुने भएको छ ।