कुनमिङबाट हिमालय एयरलाइन्सले २ लाख डोज खोप काठमाडौं ल्याउने
काठमाडौं । चीन सरकारले अनुदानमा दिने कोभिडविरुद्धको २ लाख डोज खोप हिमालय एयरलाइन्सले निःशुल्क ल्याइदिने भएको छ । हिमालय एयरलाइन्सले उक्त खोप युनान प्रान्तको कुनमिङबाट निःशुल्क नेपाल ल्याइदिने भएको हो । विज्ञप्ति जारी गरी हिमालय एयरलाइन्सले कुनमिङमा गर्ने कार्गो उडानका क्रममा २ लाख डोज खोप ल्याउने जनाएको छ ।
चार उडानबाट कूल ४१७ वटा खोपका बक्स काठमाडौं ल्याइने हिमालयले जानकारी दिएको छ । एउटा उडानमा हिमालयले १०५ बक्स ल्याउनेछ । पहिलो उडान मंगलबार बिहान साढे ६ बजे काठमाडौंमा अवतरण गरेको थियो ।
यसमा पहिलो लट आएको हिमालयले जानकारी दिएको छ। यो निःशुल्क ढुवानीबाट सरकारलाई २ करोड रुपैयाँ सहयोग पुगेको हिमालय एयरलाइन्सले जानकारी दिएको छ । बाँकी ८ लाख डोज खोप नेपाल एयरलाइन्सले बेइजिङबाट आजै ल्याउँदै छ।
