बेलायत र फिनल्याण्डबाट ठूलो परिमाणमा स्वास्थ्य सामग्री काठमाडौं आइपुग्यो
काठमाडौं । बेलायत सरकारले नेपाललाई सहयोग गरेका स्वास्थ्य सामग्री शुक्रबार बिहान काठमाडौं आइपुगेको छ । बेलायत सरकारले २६० भेन्टिलेटर, १९ हजार २ सय थान फेससिल्ड लगायतका स्वास्थ्य सामग्री शुक्रबार बिहान चार्टर्ड उडानबाट काठमाडौं पठाएको हो ।
ती सामग्रीहरु शुक्रबार बिहान त्रिभुवन अन्तर्राष्ट्रिय विमानस्थलमा नेपालका लागि बेलायती राजदूतत निकोला पोलिटले स्वास्थ्यमन्त्री हृदयेश त्रिपाठीलाई हस्तान्तरण गरेको परराष्ट्र मन्त्रालयले जनाएको छ । सोही उडानबाट च्यारिटी संस्था नेपाल मेड युकेले प्रदान गरेको अक्सिजन कन्सन्ट्रेटर पनि ल्याइएको विज्ञप्तिमा उल्लेख छ ।
त्यस्तै, फिनल्याण्ड सरकारले पठाएको स्वास्थ्य सामग्री पनि शुक्रबार बिहान काठमाडौं आइपुगेको छ । फिनल्याण्डले ३ लाख ५० हजार एफएफपीटु मास्क, एक लाख एन ९५ मास्क, २ लाख ३२ हजार ५०० ग्लोब्स, ३० हजार पीपीई गाउन, २४ लाख फेसमास्क र ३ लाख ५० हजार फेस फेस सिल्ड रहेका छन् ।
