चीनले अनुदानमा दिएको आठ लाख डोज खोप काठमाडौं आइपुग्यो
काठमाडौँ । चीनले अनुदानमा दिएको कोभिडविरुद्धको खोप सोमबार बिहान काठमाडौं आइपुगेको छ । चीनको सरकारी कम्पनी सिनोफार्मले उत्पादन गरेको कोरोना भाइरसविरुद्धको खोपको ८ लाख डोज काठमाडौं आइपुगेको हो ।
सोमबार बिहान उक्त खोप चिनियाँ राजदूत हउ यान्छीले त्रिभुवन अन्तर्राष्ट्रिय विमानस्थलमा स्वास्थ्यमन्त्री हृदयेश त्रिपाठीलाई हस्तान्तरण गरेकी छन् । खोप लिन नेपाल एयरलाइन्यसको वाइडबडी जहाज आइतबार साँझ बेइजिङ गएको थियो ।
चीनले अनुदानमा ८ लाख डोज खोप उपलब्ध गराउने घोषणा गरे अनुसारको यो खोप हो । यसअघि नेपाललाई भारत सरकारले सिरम इन्स्टिच्युट अफ इन्डियाद्वारा उत्पादित कोभिसिल्डको १० लाख डोज अनुदानमा उपलब्ध गराएको थियो ।
त्यस्तै नेपालले सिरमसँग २० लाख डोज खोप खरिद गरेको छ । त्यसमध्ये दश लाख डोज आइसकेको छ भने बाँकी दश लाख डोज अप्रिल पहिलो साता आइपुग्ने बताइएको छ । त्यस्तै भारतीय सेनाले आइतबार नेपाली सेनालाई १ लाख डोज कोरोना खोप सहयोगमार्फत उपलब्ध गराएको छ ।
