महान्यायाधिवक्ता खरेलले दिए पदबाट राजीनामा
काठमाडौं । महान्यायाधिवक्ता अग्नि खरेलले पदबाट राजीनामा दिएका छन् । शुक्रबार दिउँसो पत्रकार सम्मेलन गरी खरेलले पदबाट राजीनामा दिएको घोषणा गरेका हुन् । पत्रकार सम्मेलनमा खरेलले प्रधानमन्त्रीसँग आफ्नो सम्बन्ध सुमधुर रहेको बताए ।
२०६४ र २०७० सालका संविधानसभामा सदस्य रहेका उनी केपी शर्मा ओली नेतृत्वको अघिल्लो सरकारमा कानुनमन्त्री थिए । खरेल महान्यायाधिवक्ता हुनुअघि एमालेका पोलिटब्युरो सदस्य थिए ।
यसअघि प्रतिनिधिसभा विघटनका विरुद्ध सर्वोच्च अदालतमा परेका मुद्दामा सुनुवाइका क्रममा पनि खरेलको राजीनामाको चर्चा भएको थियो । उक्त मुद्दामा सरकारका तर्फबाट राम्ररी प्रतिरक्षा गर्न नसकेको भन्दै प्रधानमन्त्री ओली असन्तुष्ट भएको र त्यसैलाई लिएर उनले राजीनामा दिन लागेको चर्चा थियो ।
खरेललाई मन्त्रिपरिषद्को सिफारिसमा राष्ट्रपति विद्यादेवी भण्डारीले २०७४ फागुन ८ गते महान्यायाधिवक्ता नियुक्त गरेकी थिइन् । उनले आफ्नो कार्यकालमा कानुन निर्माणमा ठूलो काम गरेको बताए । उनी २६ औं महान्यायाधिवक्ता हुन् ।
