४० वर्षदेखि भारतीय जेलमा रहेका इलामका दुर्गाप्रसाद गौतमलाई रिहा गर्न आदेश
काठमाडौं । करिब ४० वर्षदेखि भारतीय जेलमा बन्दी जीवन बिताइरहेका इलामका दुर्गाप्रसाद तिम्सिना(दीपक जैसी)लाई कोलकाताको उच्च अदालतले रिहा गर्न आदेश दिएको छ ।
कोलकाता उच्च अदालतका मुख्य न्यायाधीश थोटथिल बी राधाकृष्णन् र न्यायाधीश अनिरुद्र रोयको इजलासले उनलाई रिहा गर्न बुधबार साँझ आदेश दिएको हो । कोलकातास्थित नेपाली महावाणिज्य दूतावासका कार्यालय सचिव सतीश थापाका अनुसार उनलाई अदालतले रिहा गर्ने आदेश दिएको हो । उनी सन् १९८१ मा हत्या अभियोगमा दार्जिलिङ जेल परेका थिए ।
उनलाई सन् २००५ मा दार्जिलिङबाट अलिपुरद्वार जेल हुँदै कोलकाता सेन्ट्रल जेल पुर्याइएको थियो । उनीसँग १० वर्ष जेल बसेका राधेश्याम दास भन्ने व्यक्तिले सञ्चारमाध्यमहरुमा खबर गरेपछि यो खुलासा भएको थियो । कोलकातास्थित दमदम सेन्ट्रल जेलमा रहेका ७५ वर्षीय जैसीसँग परिवारका सदस्यले एक महिनाअघि भेटेर आफन्त भएको पुष्टि गरेका थिए ।
