२०७५ जेठ २ अघिको अवस्थाका आधारमा अगाडि बढ्ने हो भने मात्र पार्टी एक रहन सक्छः रामकुमारी झाँक्री

काठमाडौं । नेकपा एमालेकी नेतृ रामकुमारी झाँक्रीले आजको दिनसम्म नेकपा एमाले एउटै हुने सम्भावना नदेखिएको बताएकी छन् । सोमबार राति सामाजिक संजाल फेसबुकमार्फत नेृत झाँक्रीले आजको संवादलाई सकारात्मक मानिएपनि एमाले एउटै हुने सम्भावना भने नदेखिएको बताएकी हुन् ।

उनले एमाले एक हुन २०७५ जेठ ३ देखि यताका सबै निर्णयहरूलाई शुन्य मान्नुपर्ने बताएकी छन्। उनले लेखेकी छन्, ‘आजको दिनसम्म नेकपा एमाले एउटै हुने सम्भावना देखिएन । षड्यन्त्र, छलछाम गरेर पाँच वर्षका लागि प्राप्त गरेको जनताको म्यान्डेटलाई संसद र पार्टी एकता भङ्ग गरेर अस्थिरता तिर धकेल्न खोज्नु जनमतको अपमान हो । तर पनि आजको संवादलाई सकारात्मक मान्न सकिन्छ । नेकपा एमाले पार्टीको अस्तित्वको आधार फागुन २३ गतेको सर्वोच्चको फैसला हो । त्यसले भनेको छ– नेकपा एमालेको वैधानिक आधार २०७५ जेठ २ अघिको अबस्था हो। त्यही आधारमा अगाडी बढ्ने हो भने मात्र पार्टी एक रहन सक्छ, त्यसका लागि आधारभूत रूपमा २०७५ जेठ ३ देखि यताका सबै निर्णयहरूलाई शून्य मान्नुपर्दछ।’