प्रचण्ड–नेपाल समूहलाई सरकारको नेतृत्व गर्न दिने विषयमा सकारात्मक हुन सकिन्छः रामचन्द्र पौडेल
चितवन । नेपाली कांग्रेसका वरिष्ठ नेता रामचन्द्र पौडेलले प्रधानमन्त्री केपी शर्मा ओलीलाई समर्थन गर्न कांग्रेसको नैतिकताले नदिने बताएका छन् ।
बिहीबार बिहान चितवनको नारायणगढमा नेपाल प्रेस युनियनले गरेको पत्रकार सम्मेलनमा वरिष्ठ नेता पौडेलले केपी ओलीले देशलाई र व्यवस्थालाई जोखिममा पारेकाले ओलीलाई सहयोग गर्न कांग्रेसको नैतिकताले नदिने बताएका हुन् ।
वरिष्ठ नेता पौडेलले प्रचण्ड–नेपाल समूहलाई सरकारको नेतृत्व गर्न दिने विषयमा सकारात्मक हुन सकिने बताए । उनले भने, ‘यसमा बरु पोजेटिभ हुन र छलफल गर्न सकिन्छ ।’ उनले कांग्रेस सरकारमा जाने नजाने भन्ने बारेमा पार्टीभित्र छलफल भएर निर्णयमा पुग्नुपर्ने बताए ।
उनले कांग्रेस आफ्नो हैसियतमा रहेर अरुलाई सरकार चलाउन सहयोग पुर्याए कांग्रेसको भूमिका अझै महत्वपूर्ण हुने बताए ।
बुधबार पार्टीका नेता एकनाथ रानाभाटको श्रद्धाञ्जली सभामा वरिष्ठ नेता पौडेलले कांग्रेसको औकात र हैसियत प्रतिपक्षमा रहने भएको भन्दै सरकारमा जान नहुने बताएका थिए । त्यसको जवाफमा सभापति शेरबहादुर देउवाले काँधमा जिम्मेवारी आए बोक्नुपर्ने भन्दै सानो चित्त नगर्न पौडेललाई आग्रह गरेका थिए ।
