अब केपी ओलीबाट देश अघि बढ्दैनः प्रचण्ड
काठमाडौं । नेकपाको प्रचण्ड–नेपाल समूहका अध्यक्ष पुष्पकमल दाहाल प्रचण्डले नेपाली राजनीतिमा देखिएको तुवाँलो र बादल फागुन २३ गते अगावै चिरिने बताएका छन् ।
बुधबार कोभिडविरुद्धको खोप लगाएपछि पत्रकारहरुसँग कुरा गर्दैै अध्यक्ष प्रचण्डले अब राजनीति नयाँ गतिमा अघि बढ्ने बताएका हुन् । उनले सर्वोच्चले संसद पुनःस्थापना गरेपछि प्रधानमन्त्री केपी शर्मा ओलीले राजीनामा दिनुपर्नेमा नैतिकता प्रदर्शन गर्न नसकेको बताए ।
उनले नैतिकता भए फागुन २३ गतेअघिनै राजीनामा दिन प्रधानमन्त्रीलाई सुझाव दिए । अध्यक्ष प्रचण्डले यदि प्रधानमन्त्रीले फागुन २३ गते अगावै राजीनामा नदिए दलहरु मिलेर हटाउने बताए । उनले अब प्रधानमन्त्री ओलीबाट देश अघि नबढ्ने र उनलाई अब अघि बढ्न नदिइने बताए ।
