आफैंले निकम्मा भनेको संसदमा उनी कुन मुख लिएर विश्वासको मत लिन जालान् ?

नारायण गाउँले ।

बा अलि लिच्चड़ नै रहेछन् ! प्रष्ट रूपमा आफ्नो एजेन्डा फेल भएपछि एक पित्को राजनैतिक इमान् हुनेले स्वत: राजीनामा दिनुपर्ने हो ।
उनले बुझेको संविधान र चालेको कदम स्पष्ट रूपमा गलत थियो भन्ने सिद्ध भएपछि एकदिन पनि पदमा बसिरहनु बेइमानी हो ।
आफैले निकम्मा भनेको र हत्या गरेको संसदमा उनी कुन मुख लिएर विश्वासको मत लिन जालान् ?

उसो त कोरोना महामारीको बीचमा पार्टी फोड्ने अध्यादेश र असफल अपहरण काण्डपछि अलिकति लाज हुनेले राजीनामा दिइसक्थ्यो ।
संसद विघटनको निर्णय एउटा असफल राजनैतिक दाउको रूपमा क्षम्य पनि हुनसक्ला तर विघटनचाहिँ अन्तर्राष्ट्रिय प्रचलन अनुसार गर्ने तर त्यही प्रचलन अनुसार राजीनामाचाहिँ नदिने र चुनाब घोषणा गरेपछि भटाभट नियुक्ति बाँड्ने उनको खेल कपटपूर्ण थियो । उनले राष्ट्रपतिदेखि अख्तियारसम्मका संस्थालाई विवादित बनाए । प्रधानमन्त्री नै ट्रकमा मान्छे जम्मा गर्दै कुनै हालतमा संसद ब्युँतन्न भन्ने भाषण गर्दै हिँड्नु आफैमा अमर्यादित थियो ।

उनी पार्टीभित्र समेत अल्पमतमा छन् भन्ने स्पष्ट नै छ । कुर्सी जोगाउन उनैले भने अनुसार अब सांसद किनबेच गर्नुपर्ने हुन्छ। आफैले असहयोगी भनेको र निलेको संसदका केही सदस्यलाई राज्यकोष खर्च गरेर किन्ने खेलमा लाग्नु त हदैसम्मको लिच्चड़पन हो !
पशुपतिनाथले सद्बुद्धि देऊन् !