भागरथीका हत्यारा छिट्टै पक्राउ पर्छन्ः गृहमन्त्री
काठमाडौं । गृहमन्त्री रामबहादुर थापाले बैतडीकी १७ वर्षीया किशोरी भागरथी भट्टको हत्यामा संलग्न छिट्टै पक्राउ पर्ने बताएका छन् । मंगलबार बिहान नेविसंघको ध्यानाकर्षणपत्र बुझ्दै गृहमन्त्री थापाले कञ्चनपुरकी बालिका निर्मला पन्तको घटनामा जस्तो भागरथीको घटनामा दोषी पत्ता लगाउन जटिल नहुने बताएका हुन् ।
नेविसंघ अध्यक्ष राजीव ढुंगाना नेतृत्वको टोलीले मंगलबार बिहान मन्त्री निवास पुल्चोक पुगेर गृहमन्त्रीलाई ध्यानाकर्षण पत्र बुझाएको हो। ध्यानाकर्षण पत्रमा भट्टको हत्या घटनामा संलग्नलाई तत्काल गिरफ्तार गरी हदैसम्मको कारबाही गर्न माग गरिएको छ ।
गृहमन्त्री थापाले सरकारको ध्यानाकर्षणका लागि धन्यवाद दिँदै सरकारले युवा, विद्यार्थी, नागरिक समाज सबैको सहयोगको अपेक्षा गरेको समेत बताएका थिए । बैतडीको दोगडाकेदार गाउँपालिका–७ की १७ वर्षीया किशोरी भट्टको गत बिहीबार लबलेक जंगलमा शव फेला गरेको थियो । भागरथी दोगडाकेदार ३ स्थित सनातन धर्म मावि खोचलेकमा कक्षा १२ मा अध्ययनरत थिइन् ।
उनको बलात्कारपछि हत्या गरिएको आशंका गरिएको छ । दोषी पत्ता नलागेसम्म शव नबुझ्ने आफन्तले बताएका छन् । सोमबार भागरथीको भजाइनल स्वाब परीक्षणका लागि राष्ट्रिय विधि, विज्ञान प्रयोगशाला काठमाडौं पठाइएको छ ।
