संवैधानिक निकायमा गरेका नियुक्तिविरुद्ध सभामुखद्वारा सर्वोच्चमा रिट दायर
काठमाडौं । सभामुख अग्नि सापकोटाले संवैधानिक परिषदको सिफारिसमा सरकारले विभिन्न आयोगहरुमा गरेको नियुक्ति बदरको माग गर्दै सर्वोच्च अदालतमा रिट दायर गरेका छन् ।
सभामुख सापकोटाले शुक्रबार सर्वोच्च अदालत पुगेर रिट दायर गरेका हुन् । रिटमा राष्ट्रपतिको कार्यालय, प्रधानमन्त्री तथा मन्त्रिपरिषदको कार्यालय, राष्ट्रिय सभाका अध्यक्षलगायत ३९ जनालाई विपक्षी बनाइएको छ ।
नियुक्तिपछि राष्ट्रपतिबाट शपथ लिई पदभार ग्रहण गरिसकेका संवैधानिक आयोगका पदाधिकारीलाई कामकारबाही गर्न नदिन पनि रिटमा माग गरिएको छ । त्यस्तै उनीहरुको नियुक्ति यथास्थितिमा राख्दै सर्वोच्च अदालतले अन्तरिम आदेश जारी गर्नुपर्ने सभामुख सापकोटाले रिटमा उल्लेख गरेका छन् ।
सभामुख सापकोटासँग प्रचण्ड–नेपाल नेतृत्वको नेकपाका नेताहरु शशी श्रेष्ठ, रामकुमारी झाँक्री, जीवनराम श्रेष्ठ र रेखा शर्मालगायत पनि अदालत पुगेका थिए । रिटको सुनुवाइका लागि माघ २५ गते पेशी तोकिएको छ ।
