अनेरास्ववियूद्वारा प्रधानमन्त्रीको पुत्ला दहन
काठमाडौँ । संसद विघटनको विरुद्धमा आन्दोलनरत नेकपाको प्रचण्ड नेपाल समूह निकटको अनेरास्ववियूले बिहीबार प्रधानमन्त्री केपी ओलीको पुत्ला जलाएको छ ।
पुस २१ गतेदेखि दोस्रो चरणको आन्दोलन सुरु गरेको अनेरास्ववियूका विद्यार्थीहरुले बिहीबार काठमाडौं उपत्यकाका प्रदर्शनीमार्गको आरआर क्याम्पस, मिनभवनमा रहेको नेपाल कमर्स क्याम्पससहित देशभर ओलीको पुत्ला दहन गरेका हुन् । पुत्ला दहनका क्रममा प्रहरीले खोस्ने प्रयास गरेको थियो । यसअघि अनेरास्ववियूले बुधबार उपत्यकामा लाल्टिन जुलुस निकालेको थियो ।
पुस ५ गते प्रधानमन्त्री ओलीको सिफारिसमा राष्ट्रपति विद्यादेवी भण्डारीले प्रतिनिधिसभा विघटन गरेपछि विद्यार्थी र नेकपाको प्रचण्ड नेपला समूह, प्रमुख प्रतिपक्षी कांग्रेस, जनता समाजवादी पार्टीलगायत दलहरु आन्दोलन गरिरहेका छन् ।