अदालतको निर्णयलाई सम्मान गर्छौंः देउवा
काठमाडौं । प्रमुख विपक्षी नेपाली कांग्रेसका सभापति शेरबहादुर देउवाले पछिल्लो राजनीतिक घटनाक्रमबाट उत्पन्न परिस्थितीमा नेपाली काँग्रेस कसैसँग नमिल्ने बताएका छन् ।
संसद विघटनको विरोधमा भक्तपुर क्षेत्र नम्बर २ मा गरिएको सभालाई सम्बोधन गर्दै सभापति देउवाले अदालतको निर्णयलाई सम्मान गर्ने आफ्नो पार्टी भएकाले नेपाली काँगे्रस कसैसँग नमिल्ने बताएका हुन् ।
नेपाली काँग्रेसले कसैसँग मिल्नुको परिणाम पहिले नै भोगिसकेकाले बहकाउमा नपर्ने बताए । संसद विघटन असंवैधानिक र अप्रजान्त्रिक कदम भएकाले आफूहरुले देशभर प्रदर्शन गरेको भन्दै उनले अदालतमा विचाराधीन मुद्दामा धम्क्याएर, तर्साएर यो निर्णय गर नेपाली कांग्रेसले नभन्ने बताए ।
सभापति देउवाले अदालतले स्वतन्त्र निर्णय गर्ने भएकाले आफूहरु निरन्तर न्यायालयको निर्णयको पर्खाइमा रहेको बताए । उनले प्रधानमन्त्री ओलीको असंवैधानिक निर्णयको नेपाली काँग्रेसले विरोध गर्दै जनताकोबीचमा जाने बताए । केही दिनपछि आफ्नो पार्टीको केन्द्रीय समिति बैठक बसी थप धारणा बनाउने सभापति देउवाको भनाई थियो ।
