प्रतिनिधिसभा विघटनविरुद्ध प्रदर्शनमा उत्रिएका अधिकारकर्मी पक्राउ
काठमाडौं । संसद विघटनको विरोधमा सिंहदरबारबाहिर प्रदर्शन गर्न गएका अधिकारकर्मीलाई प्रहरीले नियन्त्रणमा लिएको छ । असंवैधानिक, स्वेच्छाचारी एवं अलोकतान्त्रिक तवरमा प्रतिनिधिसभा विघटन गरिएको भन्दै मानव अधिकार तथा शान्ति समाजले सिंहदरबार दक्षिण गेट अगाडि प्रदर्शन गर्न खोज्दा प्रहरीले नियन्त्रणमा लिएको हो ।
प्रदर्शनका क्रममा समाजका संस्थापक सभापति कृष्ण पहाडी, सभापति उत्तम पुडासैनी, संस्थापक सदस्य कृष्ण कँडेल, पुर्वमहासचिव कुमारराज सुवेदी, सचिव बलबहादुर गाहा मगर लगायत १६ जनालाइ प्रहरीले पक्राउ गरेको समाजले जनाएको छ ।
प्रधानमन्त्री केपी शर्मा ओलीको र राष्ट्रपति विद्यादेवी भण्डारीको मिलेमतोका कारण प्रतिनिधिसभा विघटन हुनु निन्दनीय भएको समाजले जनाएको छ । त्यस्तै प्रतिनिधिसभा विघटन असंबैधानिक, स्वेच्छाचारी एवं अलोकतान्त्रिक भएको मानव अधिकार तथा शान्ति समाजको ठहर छ ।
