विराटनगरमा उपचारका क्रममा दुई जना कोरोना संक्रमित महिलाको मृत्यु
विराटनगर । विराटनगरमा उपचाररत दुई जना कोरोना संक्रमितको मृत्यु भएको छ । धनकुटाकी ३२ वर्षीया र विराटनगरकी ५१ वर्षीया कोरोना संक्रमित महिलाको शुक्रबार बिहान मृत्यु भएको हो ।
धनकुटाकी महिलाको कोशी अस्पताल कोभिड–१९ उपचार केन्द्रमा बिहान ८ः१५ बजे मृत्यु भएको हो । उपचार केन्द्रका व्यवस्थापक ज्ञानबहादुर बस्नेतका अनुसार पीसीआर परीक्षण गराउँदा बिहीबार कोरोना पुष्टि भएपछि उनलाई साँझ उपचारका लागि भर्ना गरिएको थियो ।
उनमा श्वासप्रश्वासको समस्या देखिएको बस्नेतले बताए । त्यस्तै विराटनगर महानगरपालिका वडा नम्बर ७ की ५१ वर्षीया महिलाको उपचारका क्रममा न्युरो अस्पतालमा मृत्यु भएको छ। अस्पतालका प्रशासकीय अधिकृत सुरेश आचार्यका अनुसार बिहान ८ बजेतिर महिलाको मृत्यु भएको हो ।
पीसीआर परीक्षण गराउँदा रिपोर्ट पोजिटिभ आएपछि गत बुधबार महिलालाई उपचारका लागि अस्पताल भर्ना गरिएको थियो । उनमा श्वासप्रश्वास र उच्च रक्तचाप सम्बन्धी समस्या रहेको बताइएको छ ।
