शिक्षा मन्त्रालयमा सरकारी वार्ता टोली र डा.केसी पक्षबीच वार्ता जारी
काठमाडौँ । सरकारी वार्ता टोली र डा. गोविन्द केसीका प्रतिनिधिबीच केहीबेर अघिदेखि शिक्षा, विज्ञान तथा प्रविधि मन्त्रालयमा वार्ता सुरु भएको छ । डा. केसीका सहयोगी प्रितम सुवेदीका अनुसार शिक्षा मन्त्रालयमा दुवै टोलीबीच अहिले वार्ता चलिरहेको छ ।
सरकारी वार्ता टोलीसँग केसीका मागहरु राख्ने र अविलम्ब पूरा गर्न आग्रह गरिने केसी पक्षका वार्ता टोलीका सदस्यले बताएका छन् । सरकारले डा. केसीसँग वार्ता गर्न बुधबार तीन सदस्यीय टोली गठन गरेको थियो । त्यसलगत्तै डा. केसी पक्षबाट पनि चार सदस्यीय वार्ता टोली बनाइएको छ ।
सरकारी टोलीमा शिक्षा सचिव गोपीनाथ मैनालीको संयोजकत्वमा स्वास्थ्य मन्त्रालयका सहसचिव डा. गुणराज लोहनी र चिकित्सा शिक्षा आयोगका निर्देशक डा. दिलीप शर्मा छन् ।
डा. केसीका तर्फबाट ‘सोलिडारिटी फर डा. केसी अलायन्स’ का डा. जीवन क्षत्रीको संयोजकत्वमा वार्ता टोली गठन गरिएको छ । टोलीमा नेपाल स्वास्थ्य अनुसन्धान परिषद्का अध्यक्ष डा. अञ्जनीकुमार झा, नेपाल चिकित्सक संघका अध्यक्ष डा. लोचन कार्की र अधिवक्ता ओमप्रकाश अर्याल सदस्य छन् ।
