महानगरीय प्रहरी कार्यालय मातहतका प्रहरी कार्यालयसँग कार्य सम्पादन सम्झौता
काठमाडौं । महानगरीय प्रहरी कार्यालय रानीपोखरीसँग मातहतका प्रहरी कार्यालयले कार्य सम्पादन सम्झौतामा हस्ताक्षर गरेका छन् । काठमाडौँमा सोमबार आयोजित एक समारोहमा कार्यालय प्रमुख, प्रहरी नायव महानिरीक्षक विश्वराज पोखरेलसँग मातहतका प्रहरी कार्यालय प्रमुखले उक्त सम्झौतामा हस्ताक्षर गरेका हुन् ।
हस्ताक्षर गर्नेमा महानगरीय विमानस्थाल सुरक्षा कार्यालयका प्रमुख प्रहरी वरिष्ठ उपरीक्षक रामकृपाल शाह, महानगरीय ट्राफिक प्रहरी महाशाखाका प्रमुख प्रहरी वरिष्ठ उपरीक्षक भीमप्रसाद ढकाल र महानगरीय अपराध महाशाखाका प्रमुख प्रहरी वरिष्ठ उपरीक्षक दीपक थापा छन् ।
यस्तै महानगरीय प्रहरी परिसर काठमाडौँका प्रमुख प्रहरी वरिष्ठ उपरीक्षक श्यामलाल ज्ञवाली र प्रहरी परिसर ललितपुरका प्रमुख प्रहरी वरिष्ठ उपरीक्षक टेकप्रसाद राईले समेत सम्झौतामा हस्ताक्षर गरेका छन् । आजै भक्तपुर प्रहरी परिसरले समेत कार्यसम्पादन सम्झौतामा हस्ताक्षर गरेको जनाइएको छ ।
सो अवसरमा प्रहरी नायव महानिरीक्षक पोखरेलले प्रहरी महानिरीक्षक शैलेश थापा क्षेत्रीबाट महानगरीय प्रहरी कार्यालयले गरेको सम्झौता र उपत्यकाको कार्यशैली अनुसार नै कार्य सम्पादन सम्झौतामा हस्ताक्षर भएको जानकारी दिए ।
उनले विश्वव्यापी महामारीको रुपमा रहेको कोभिड–१९ सङ्क्रमणको विषम परिस्थितिमा उपत्यकाको शान्ति सुरक्षामा गर्व गर्न लायक काम भएको भन्दै सम्बन्धित कार्यालयका प्रमुखको प्रशंसासमेत गरेका छन् ।
प्रहरी नायव महानिरीक्षक पोखरेलले आजको सम्झौताले महानगरीय प्रहरीलाई पद्धतिगत रुपमा अगाडि बढाउन सहयोग पुग्ने विश्वास व्यक्त गरे ।
प्रहरी कर्मचारीले कार्यसम्पादनको क्रममा पवित्र, विवेकशील भई अगाडि बढ्नुपर्ने उल्लेख गर्दै उनले सधैँजसो नागरिकको चासो र सरोकारका विषय बन्ने गरेको प्रहरी सेवा रणनीतिक, योजनाबद्ध, निरन्तर र परिणाममुखी हुनुपर्नेमा जोड दिए । प्रहरीको आचरण, व्यवहार, व्यवसायिकता र पारदर्शीता, फरार प्रतिबादी पक्राउलगायत विषयमा आपसमा प्रतिस्पर्धी भएर लाग्न समेत उनले मातहतका कार्यालयलाई निर्देशन दिए ।
