यसरी राखियो रानीपोखरीको बालगोपालेश्वर मन्दिरमा गजुर, फोटोमा हेर्नुस्
काठमाडौं । रानीपोखरीको मध्यभागमा रहेको बालगोपालेश्वर मन्दिरमा गजुर प्रतिस्थापन गरिएको छ । मन्दिरको पुनर्निर्माणको काम अन्तिम चरणमा पुगेकाले बिहीबार सुनको लेपन भएको गजुर राखिएको हो ।
२०७२ सालको भूकम्पमा क्षतिग्रस्त मन्दिर यसअघि गुम्बज शैलीमा निर्माण गरिएको बालगोपालेश्वरको मन्दिर विज्ञहरुको प्रतिवेदन अनुसार प्रताप मल्लको पालामा बनाइको ग्रन्थकुट (शिखर) शैलीमा पूननिर्माण गरिएको छ ।
१८९० को भूकम्पमा मन्दिरमा क्षति भएपछि गुम्बज शैलीमा पुननिर्माण गरिएको थियो । तर यसपटक फेरि पुरानै शैलिमा पुनर्निर्माण गरिएको हो । ताम्रपत्रमा सुनको लेपन लगाएर गजुरको निर्माण गरिएको हो ।
राष्ट्रिय पुननिर्माण प्राधिकरणका सहसचिव भरत प्रसाद आर्यालले मन्दिरमा राखिएका सबै गजुरमा करिब २८ तोला सुनको जलप लगाइएको जानकारी दिए । गजुर निर्माणमा करिब ३३ लाख रुपैयाँ खर्च भएको उनले बताए । २०७२ माघ ३ गते राष्ट्रपति विद्यादेवी भण्डारीले रानीपोखरी पुनर्निर्माणको शिलान्यास गरेकी थिइन् । शिलान्यास भएको करिब ५ वर्षपछि अब पुनर्निर्माण सकिने चरणमा छ ।
