भदौ १६ गतेदेखि शर्तसहित अन्तर्राष्ट्रिय उडान सुरु गर्ने सरकारको निर्णय
काठमाडौं । सरकारले भदौं १६ देखि अन्तर्राष्ट्रिय उडान सुरु गर्ने निर्णय गरेको छ । बिहीबार बसेको मन्त्रिपरिषको बैठकले पीसीआर परिक्षण रिर्पोट नेगेटिभ आएका विदेशमा रहेका नेपालीका लागि उडान अनुमति दिने निर्णय गरेको शुक्रबार आयोजित पत्रकार सम्मेलनमा सरकारका प्रवक्ता डा. युवराज खतिवडाले जानकारी दिएका हुन् ।
पीसीआर परीक्षण सहज नभएका मुलुकमा रहेका नेपालीलाई भने नियमित उडानमा नल्याउने बैठकले निर्णय गरेको छ । प्रवक्ता खतिवडाका अनुसार अब संस्कृति पर्यटन तथा नागरिक उड्ययन मन्त्रायले दैनिक ५०० यात्रु नकट्ने गरी उडान तालिका बनाउने छ ।
नियमित उडानबाट आउने नागरिक, कूटनीतिक नियोगका कर्मचारीले अनिवार्य रुपमा ७२ घण्टा अगाडि पीसीआर परीक्षण गरेको नेगेटिभ रिपोर्ट देखाउनुपर्ने छ । सरकारले पीसीआर परीक्षण प्रक्रिया जटिल भएका कतार, कुवेत र साउदी अरेबियाबाट भने नियमित उडानको माध्यमबाट यात्रु नल्याउने निर्णय गरेको छ ।
त्यहाँ अप्ठेरोमा परेका नागरिकलाई कूटनीतिक नियोगको सिफारिस अनुसार चार्टर्ड उडानबाट ल्याइने प्रवक्ता खतिवडाले जानकारी दिए । सरकारले कोरोना संक्रमणको जोखिमलाई नियन्त्रण गर्न उद्धारमा नयाँ मापदण्ड बनाएको हो ।
