विराटनगरमा ‘होम आइसोलेसन’मा बसेका कोरोना संक्रमितको मृत्यु
विराटनगर । विराटनगरमा ‘होम आइसोलेसन’मा बसेका एक जना कोरोना संक्रमित पुरुषको मृत्यु भएको छ । बुधबारदेखि होम आइसोलेनमा बसेका ४५ वर्षीय पुरुषको बिहीबार राति मृत्यु भएको हो ।
भदौ १ गते सोमबार उनको स्वाब संकलन गरिएकोमा बुधबार संक्रमित पुष्टि भएको थियो । कोभिड अस्पतालमा आइसोलेसन बेडको अभाव रहेको भन्दै उनलाई ‘होम आइसोलेसन’मै राखिएको थियो ।
स्वास्थ्य अवस्था गम्भीर बन्दै गएपछि अस्पतालको आइसोलेसनमा लैजाने तयारी हुँदै गर्दा मृत्यु भएको बताइएको छ । मृतकको शव व्यवस्थापनका लागि नेपाली सेनाको टोलीले लैजाने तयारी गरिरहेको छ । विराटनगरमा हालसम्म कोरोना कारण ९ जनाले ज्यान गुमाइसकेका छन् ।