बझाङका एक पुरुषको मृत्युपछि कोरोना पुष्टि, मृतकको संख्या ४९

काठमाडौं । कोरोना भाइरसको संक्रमणबाट थप एक जनाको मृत्यु भएको छ । बझाङको बुंगल गाउँपालिकाका ६५ वर्षीय पुरुषको मृत्युपछि कोरोना पुष्टि भएको स्वास्थ्य मन्त्रालयका प्रवक्ता डाक्टर जागेश्वर गौतमले जानकारी दिएका छन् ।

उनको गत साउन ९ गते घरमा मृत्यु भएको थियो । पछि परीक्षणको नतिजा आउँदा उनमा कोरोना पोजेटिभ देखिएको हो । दमका समेत रोगी रहेका उनी गत असार २४ गते भारतको बैङ्गलोरबाट आएका थिए । उनी १४ दिनको क्वारेन्टिन बसाइपछि घर गएका थिए । तर गत साउन ९ गते उनको घरमा मृत्यु भएको थियो । योसँगै कोरोनाबाट मृत्यु हुनेको संख्या ४९ पुगेको छ ।