कोरोना संक्रमणबाट धनुषाको डुमरियाका ३८ वर्षीय पुरुषको मृत्यु

जनकपुरधाम । धनुषाको सहिदनगर नगरपालिकाको डुमरियाका ३८ वर्षीय पुरुषको कोरोना संक्रमणबाट आइतबार मृत्यु भएको छ । अत्यधिक ज्वरो, रुघाखोकी लागेपछि उनी शनिबार प्रादेशिक अस्पतालको आइसोलेसनमा भर्ना भएका थिए । उनलाई फोक्सो र मुटुमा समेत समस्या थियो ।

स्वास्थ्य अवस्था जटिल बनेपछि जनकपुरबाट थप उपचारका लागि धरानस्थित बीपी कोइराला स्वास्थ्य विज्ञान प्रतिष्ठान लैजाँदै गर्दा उनको बाटोमै मृत्यु भएको प्रादेशिक अस्पतालका मेडिकल सुपरिटेण्डेन्ट डा. नागेन्द्र यादवले जानकारी दिएका छन् । उनको आइतबार बिहान स्वाबको नमुना लिई प्रादेशिक अस्पतालको प्रयोगशालामा परीक्षण गरिएको थियो । परीक्षण नतिजा पोजिटिभ आएको थियो ।