पोखराकी प्रेन्साको प्रतिभा(भिडियोसहित)
पोखरा । मानिसका प्रतिभा पनि कस्ता कस्ता हुन्छन् । कालिकोटका विजय शाही सयौं पृष्ठको पुस्तक केही मिनेट हेरेको भरमा सबै हुबहु लेख्न सक्छन् । उनको प्रतिभा देखेर जोसुकै पनि आश्चर्य मान्छन् । कमला घिमिरे, आयुषा गौतम उमेरले सानै छन् । तर लोकदोहोरीको क्षेत्रमा उनको प्रतिभाले उनीहरुर्लाइ अब्बल बनाएको छ ।
यस्तै प्रतिभा भएकै कारण पोखराकी आठ वर्षीया प्रेन्सा रेग्मी पनि अहिले सबैको माझ चिनिएकी छन् । कक्षा तीनमा अध्ययनरत प्रेन्सा बहुप्रतिभाकी छन् । लामो खालको अनुच्छेद पनि नहेरीकन प्रस्ट बोलीमा भन्न सक्ने उनको विलक्षण क्षमता छ । लकडाउनकै बेलामा २ कक्षा उत्तीर्ण भइ ३ पुगेकी उनले आफ्नो कक्षाका विषय भिडियोमार्फत अरु साथीलाई पढाउने गरेकी छन् । अंग्रेजी, गणित, विज्ञान, नेपाली लगायतका मुख्य–मुख्य विषय उनले एकचरण पढेर भ्याइसकेको बताइन् । सबै उनलाई कण्ठस्थ आउने गरेको उनका अभिभावक बताउँछन् ।
उनको यो प्रतिभा त छँदैछ त्यो बाहेक उनी समाजसेवातर्फ पनि लागेकी छन् । त्यसैले अहिले पोखरा महानगरपालिका वडा नम्बर १७ बिरौटामा पुग्नुभयो भने प्रेन्सालाई मास्क बेचिरहेको भेटिन्छ । उनले केही हप्तायता आफ्नो घर नजिकै चौतारोमा बसेर मास्क बेच्ने गरेकी छन् । उनले मास्क आफ्नै दैनिकी चलाउन नभई मास्क विक्रि गरेको पैसा समाजसेवामा लगाउन हो । आयआर्जन कम रहेका परिवारका आफूजस्तै उमेरका साना भाइबहिनीको लागि उनले बचत रकम सहयोग गर्ने गरेको बताइन् ।
हेरौं प्रेन्साको प्रतिभाः
