आफ्नो मर्यादा र जिम्मेवारीको ख्याल गर्न राष्ट्रपतिलाई शेखर कोइरालाको सुझाव
काठमाडौं । नेपाली कांग्रेसका केन्द्रीय सदस्य डा.शेखर कोइरालाले सत्तारुढ नेपाल कम्युनिष्ट पार्टीको आन्तरिक राजनीतिमा राष्ट्रपति विद्यादेवी भण्डारीको सक्रियता बढ्नु देश र लोकतन्त्रका लागि दुःखद भएको बताएका छन् ।
नेकपाभित्र बढेको अन्तरकलह र विवाद मिलाउन भन्दै शीतलनिवासमा नेताहरुको दौडधुप बाक्लिएपछि डा. कोइरालाले यस्तो बताएका हुन् । डा. कोइरालले ट्वीटमार्फत राष्ट्रपतिले आफ्नो मर्यादा र जिम्मेवारीको ख्याल गर्न पनि सुझाव दिएका छन् ।
कोइरालाले लेखेका छन्,‘राष्ट्रपति सामान्य र राजनीतिक व्यक्ति होइन। साझा,सम्मानित र सर्वोच्च निकाय हो। राष्ट्रपतिले आफ्नो जिम्मेवारी, संविधानको मर्यादा र संस्थाको गरिमालाई ख्याल गर्नुपर्छ।पछिल्ला दिनमा नेकपा भित्रको आन्तरिक राजनीतिमा राष्ट्रपतिको सक्रियता बढ्नु देश र लोकतन्त्रको लागी अत्यन्तै दुःखद हो।’ केही सातादेखि नेकपाभित्र विवाद चर्किएपछि शीतल निवास पुगेर राष्ट्रपतिलाई साक्षी राख्दै शीर्ष नेताहरुले छलफल चलाइरहेका छन् । शनिबार पनि नेकपा अध्यक्षद्वय केपी ओली र पुष्पकमल दाहाललगायतका नेताहरु शीतल निवास पुगेका थिए ।
